Святому преподобному Силуану Афонскому

Молитва О предивный угодниче Божий, отче Силуане! По благодати, тебе от Бога данной, слезно моляйся о всей вселенной, о мертвых, живых и грядущих, не промолчи за нас ко Господу, к тебе усердно припадающих и твоего предстательства умильно просящих. Подвигни, о всеблаженне, на молитву усердную Заступницу рода христианскаго, Преблагословенную Богородицу и Приснодеву Марию, чудно призвавшую тя быти верным делателем в Ея земном вертограде, идеже избранницы Божии о гресех наших Бога умоляют. Да не помянет Господь неправд и беззаконий наших, но по неизреченной благости Своей ущедрит и спасет нас по велицей милости Своей. Ей, угодниче Божий, с Преблагословенною Владычицею мира, Святейшею Игумениею Афона, и со святыми подвижниками Святой Горы испроси для боголюбивых пустынножителей ея сохранитися в мире от всех бед и наветов вражиих. Да ангелы святыми от зол избавляеми и Духом Святым в вере и братолюбии укрепляеми, до скончания века о Единей, Святей, Соборней и Апостольстей Церкви молитвы творят и всем путь спасения указуют. Народом земли всея испроси благоденственное и мирное житие, дух смиренномудрия и братолюбия, добронравия и спасения, дух страха Божия. Да не злоба и беззаконие ожесточают сердца людская и низвергают их в богопротивную вражду и братоубийство, но в силе Божественныя любве и правды да святится имя Божие, да будет воля Его в человецех, и да воцарится мир и Царствие Божие на земли. Такожде и земному Отечеству твоему, Земли Российстей, испроси, угодниче Божий, вожделенный мир и небесное благословение, да всемощным омофором Матере Божией покрываему избавитися от глада, губительства, труса, огня, меча, нашествия иноплеменников и междоусобныя брани, и от всех враг видимых и невидимых, и тако святейшим домом Преблагословенныя Богородицы до скончания века пребыти, Креста Животворящаго силою и в любви Божией неоскудеваему утвердитися. Нам же всем, во тьму грехов погружаемым, покаяния тепла и страха Божия не имущим и сице безмерно любящаго нас Господа непрестанно оскорбляющим, испроси, о всеблаженне, у Всещедраго Бога: да Своею всесильною благодатию божественне посетит и оживотворит души наша, и всяку злобу, и гордость житейскую, и уныние, и нерадение в сердцах наших упразднит. Еще молимся: да и нам, благодатию Всесвятаго Духа укрепляемым и любовию Божиею согреваемым, в человеколюбии и братолюбии, в смиренном сраспинании друг за друга и за всех, в правде Божией утвердитися и в благодатней любви Божией благонравно укрепитися, и сынолюбне к Нему приближитися. Да тако, творя Его всесвятую волю, во всяком благочестии и чистоте временнаго жития путь непостыдно прейдем и со всеми святыми Небеснаго Царствия и Агнчаго брака сподобимся. Ему же от всех земных и небесных да будет слава, честь и поклонение, со Безначальным Его Отцем, Пресвятым и Благим и Животворящим Его Духом, ныне и присно и во веки веков. Аминь.