Молитва пред иконою "Утоли моя печали" (25 января / 7 февраля)

Тропарь, глас 5-й Утоли болезни многовоздыхающия души моея, Утолившая всяку слезу от лица земли: Ты бо человеком болезни отгониши и грешных скорби разрушаеши. Тебе бо вси стяжахом надежду и утверждение, Пресвятая Мати Дево. Кондак, глас 6-й Не ввери мя человеческому предстательству, Пресвятая Владычице, но приими моление раба Твоего, скорбь бо обдержит мя, терпети не могу демонскаго стреляния. Покрова не имам, ниже где прибегну, окаянный, всегда побеждаем, и утешения не имам, разве Тебе, Владычице мира, упование и предстательство верных, не презри моление мое, полезно сотвори. Молитва Надеждо всех концев земли, Пречистая Дево, Госпоже Богородице, утешение мое! Не гнушайся нас грешных, на Твою бо милость уповаем. Угаси в нас пламень страстей и покаянием ороси изсохшая сердца наша, очисти ум наш от греховных помыслов, приими мольбы, от души и сердца со воздыханием Тебе приносимые. Буди о нас ходатаица к Сыну Твоему и Богу и отврати гнев Его матерними Твоими молитвами. Душевныя и телесныя язвы исцели, Госпоже Владычице, утоли болезнь души и тела, утиши бурю злых нападений вражеских, отъими бремя грехов наших и не остави нас до конца погибнути. Печалию сокрушенная сердца наша утеши, да славим Тя до последняго издыхания нашего. Аминь.