Молитва пред иконою Киево-Печерской, именуемою "Успение" (15 / 28 Августа)

Тропарь, глас 4-й: В рождестве девство сохранила еси, во успении мира не оставила еси, Богородице; преставилася еси к животу, Мати сущи Живота, и молитвами Твоими избавляеши от смерти души наша. Кондак, глас 2-й: В молитвах неусыпающую Богородицу и в предстательствах непреложное упование, гроб и умерщвление не удержаста: якоже бо Живота Матерь, к животу престави, во утробу вселивыйся приснодевственную. Молитва: О Пресвятая Богородице Дево, Владычице, вышшая ангел и архангел и всея твари честнейшая, ангельское удивление, пророческая проповедь, апостольская похвало, святителей украшение, мучеников утверждение, иноков наставление, постников воздержание, девствующих чистото, матерей тихое веселие, младенцев мудросте и вразумление, вдовиц и сирых кормительнице, нагих одеяние, болящих здравие, пленников избавление, по морю плавающих тишино, обуреваемых небурное пристанище, блуждающих наставнице, путешествующих прохождение, труждающихся покоище, в бедах сущих скорая заступнице, обидимых покрове и прибежище, ненадеющихся надеяние, требующих помощнице, печальных утешение, грешников спасение и к Богу присвоение, правоверных твердое ограждение, непобедимое поможение и заступление. Тобою нам, Владычице, Невидимый видим бысть, и Тебе мольбу приносим, Госпоже, грешнии раби Твои: о Премилостивая и Пречудная, Царице, рождшая Царя Христа, Бога нашего, Живодавца всех, небесными славимая и земными хвалимая, светозарная звездо, святых пресвятейшая, Царице цариц, Владычице всех тварей, боголепная Девице, нескверная Невесто, палато Духа Пресвятаго, огненный престоле невидимаго Царя, небесный кивоте, носило Слова Божия, огнеобразная колеснице, покоище Живаго Бога, неизреченная тайно, несведомое чудо, благоуханное кадило, душевный раю, цвете прекрасный, грозде спасения нашего, чаше Царя Небеснаго, ходатаице веры Христовы, еретиков пагубо, бесов устрашение, во бранех побеждение, христиан всех хранительнице и мира всего спасение. О Всемилостивая Госпоже, Дево Владычице Богородице, услыши нас, молящихся Тебе, и яви милость Твою на люди Твоя: моли Сына Своего избавитися нам от всякаго зла, сохрани обитель нашу, всякий град и страну верных, и люди, благочестно прибегающия и призывающия Имя Твое святое, от всякия напасти, губительства, глада, труса, потопа, огня, меча, нашествия иноплеменников, междоусобныя брани, всякия болезни и всякаго обстояния. Да ни ранами, ни прещением, ни мором, ни праведным гневом Божиим умалятся раби Твои, но соблюдай и спасай милостию Твоею, Госпоже; и полезное воздуха благорастворение, ко времени плоднаго приношения, нам даруй. Облегчи, возстави и помилуй, Премилостивая Владычице, во всякой беде и нужде сущия. Помяни рабы Твоя, не презри слез и воздыхания нашего, и обнови нас благостию Твоея милости, да со благодарением утешаемся, обретше Тя Помощницу. Умилосердися, Госпоже Пречистая, на немощныя люди Твоя: разсеянныя собери, заблудшия на путь правый настави, отпадшыя от благочестивыя отеческия веры паки возврати, старость поддержи, юныя вразуми, младенцы воспитай, и славящыя Тя прослави; изряднее же Церковь Сына Твоего соблюди и сохрани в долготу дний. О Милостивая и Премилостивая Царице Небесе и земли, Богородице Приснодево, ходатайством Твоим помилуй вся православныя христианы, сохраняющи их под кровом милости Твоея, ризою Твоею честною защити, и моли воплошагося от Тебе без семене Христа Бога нашего, да препояшет ны свыше силою на вся видимыя и невидимыя враги наша, на иноплеменники и единоплеменники, воюющыя на нас и на веру нашу православную. Спаси же и помилуй, Госпоже, Святейшаго Патриарха, митрополиты, архиепископы и епископы православныя, иереи и диаконы, весь причет церковный, весь монашеский чин, и вся правоверныя люди, поклоняющыяся и молящыяся пред честною Твоею иконою. Призри на всех нас призрением милостивнаго Твоего заступления, воздвигни нас из глубины греховныя, просвети очи сердечныя ко зрению спасения, милостива нам буди зде, и на Страшнем Суде Сына Твоего о нас умоли. Преставльшыяся во благочестии рабы Твоя в вечней жизни со ангелы, архангелы и всеми святыми причти, да одесную Сына Твоего Бога предстанут; и молитвою Твоею сподоби вся православныя христианы со Христом жити и радости ангельския в небесных селениих наслаждатися. Ты бо еси, Госпоже, слава Небесных и упование земных, надеждо и заступнице всех, притекающих к Тебе и Твоея святыя помощи просящих. Ты молебница наша теплая к Сыну Твоему и Богу нашему; Твоя Матерняя молитва много может на умоление Владыки, и Твоим предстательством ко престолу благодати Пресвятых и Животворящих Его Таин приступати дерзаем, аще и недостойнии. Темже всечестный образ Твой и рукою Твоею держимаго Вседержителя на иконе видяще, радуемся, грешнии, со умилением припадающе и любовию его целуем, чающе, Госпоже, Твоими святыми Богоприятными молитвами дойти Небесныя безконечныя жизни, и непостыдно стати в день судный одесную Сына Твоего и Бога нашего, яко да славим Его, купно со Безначальным Отцем и Пресвятым, Благим, Животворящим и Единосущным Духом, во веки веков. Аминь.