Молитва пред иконою "Достойно есть" (11 / 24 Июня)

О, Пресвятая Дево Богородице, в скорбех наших едино утешение! Тобою, Дево Богородице, пение послушника афонского чудесне дополнися: восполни убо и наша силы духовныя, яко да возможем достойно пети Тя, воистину рождшую Спасителя миру. Вознеси моление к Сыну Твоему о нас, да не оскудеет вера в нас, грешных, юже диавол исхитити тщится в рабех Твоих и во всем христианстем роде. О сих сокрушенным сердцем молим Тя: помози нашему маловерию, избави нас от дел злонравных, от самолюбия и гордыни, от сребролюбия и сластолюбия, от невоздержания и пианства. Предстательством Твоим, Пречистая, да избавимся от сих страстей и да сподобимся спасение получити благодатию Господа нашего Иисуса Христа, Ему же подобает честь, благодарение и поклонение со Безначальным Его Отцем и со Святым и Единосущным Ему Духом во веки веков. Аминь.