Молитва о том, чтобы с любовью ухаживать за болящими - молитвы о болящих

Господи, Иисусе Христе, Сыне Бога Живаго, Агнче Божий, вземляющий грехи мира, Пастырю добрый, положивший душу Твою за овец Твоих, Небесный Врачу душ и телес наших, исцеляющий всякий недуг и всякую язву в людях Твоих! Тебе припадаю, помози мне, недостойной рабе Твоей. Призри, Многомилостивый, на делание и служение мое, даждь ми быти верною в малом, послужити болящим Тебе ради, носити немощи немощных, и не себе, но Тебе Единому угождати во вся дни живота моего. Ты бо рекл еси, о Сладчайший Иисусе: "Понеже сотвористе единому от сих братий Моих меньших, Мне сотвористе". Ей, Господи, суди мне, грешной, по сему глаголу Твоему, яко да сподоблюся творити благую Твою волю во отраду и утешение искушаемых, недугующих раб Твоих, ихже искупил еси честною Твоею Кровию. Ниспосли ми благодать Твою, попаляющую во мне страстей терние, призвавый мя, грешную, на дело служения о Имени Твоем. Без Тебе не могу творити ничесоже. Посети убо нощию и искуси сердце мое, внегда предстояти ми у возглавия болящих и низверженных, уязви душу мою Твоею любовию, вся терпящею и николиже отпадающею. Тогда возмогу, Тобою укрепляема, подвигом добрым подвизатися и веру соблюсти, даже до последнего моего издыхания. Ты бо еси Источник исцелений душевных же и телесных, Христе Боже наш, и Тебе, яко Спасителю человеков и Жениху душ, грядущему в полунощи, славу и благодарение и поклонение возсылаем, ныне и присно и во веки веков. Аминь.