Молитва о спасении России

Молитва Господи Иисусе Христе, Боже наш! Прими от нас, недостойных рабов Твоих, усердное моление сие. Прости нам вся согрешения наша, помяни всех врагов наших, ненавидящих и обидящих нас, и не воздай им по делам их, но по велицей Твоей милости обрати неверных к правоверию и благочестию, а верных утверди во еже уклонятися от зла и творити благое. Нас же всех и Церковь Твою Святую всесильною Твоею крепостию от всякаго злаго обстояния милостивно избави. Отечество наше от безбожников и власти их свободи. Верных же рабов Твоих, в скорби и печали день и ночь вопиющих к Тебе, многоболезненный вопль услыши, многомилостивый Боже наш, и изведи из истления живот их. Подаждь же мир и тишину, любовь и утверждение, и скорое примирение людям Твоим, их же Честною Твоею Кровию искупил еси. Но и отступившим от Тебе и Тебе не ищущим явлен буди, воеже ни единому от них погибнути, но всем им спастися и в разум истины прийти, да вси в согласном единомыслии и в непрестанной любви прославят пречестное имя Твое, терпеливодушный и незлобивый Господи, во веки веков. Аминь.