Cвятому равноапостольному Великому Князю Владимиру

Молитва первая О великий угодниче Божий, богоизбранный и богопрославленный, равноапостольный княже Владимире! Ты отринул еси зловерие и нечестие языческое, уверовал еси во Единаго Истиннаго Триипостаснаго Бога и, восприяв Святое Крещение, просветил еси светом Божественныя веры и благочестия всю страну Русскую. Славяще и благодаряще Премилосердаго Творца и Спасителя нашего, славим и тя, просветителю наш и отче, яко тобою познахом спасительную веру Христову и крестихомся во Имя Пресвятыя Троицы. Ты еси первый вождь наш к Начальнику и Совершителю спасения, Господу Иисусу Христу; ты еси теплый молитвенник и ходатай о стране Русской, о воинстве и о всех людех. О всеблагий отче и просветителю наш, призри на немощи наша и умоли Премилосердаго Царя Небеснаго: да не прогневается на ны зело, да не погубит нас со беззаконьми нашими, но да помилует и спасет нас по милости Своей. Да всадит в сердца наша спасительный страх Свой, да просветит Своею благодатию ум наш, во еже разумети пути Господни, оставити стези нечестия и заблуждений и ходити во стезях спасения и истины, исполняя заповеди Божии и уставы Святыя Церкве. Моли, благосерде, Человеколюбца Господа, да пробавит нам великую милость Свою: да избавит нас от нашествия иноплеменных, от внутренних нестроений, мятежей и раздоров, от глада, смертоносных болезней и от всякаго зла. Да подаст нам благорастворение воздуха и плодоносие земли, пастырем ревность о спасении пасомых, всем же людем усердие в службах своих, любовь и единомыслие между собою, верное подвизание на благо Отечества и Святыя Церкве. Да возсияет свет спасительныя веры в стране нашей во всех концех ея, да упразднятся ереси и расколы, и да, поживше в мире на земли, сподобимся с тобою вечнаго блаженства, хваляще и превозносяще Бога во веки веков. Аминь. Молитва вторая О великий угодниче Божий, равноапостольный княже Владимире! Призри на немощи наши и умоли Премилосердаго Царя Небеснаго: да не прогневается на ны зело и да не погубит нас со беззаконьми нашими, но да помилует и спасет нас по милости Своей. Да всадит в сердца наша покаяние и спасительный страх Божий, да просветит Своею благодатию ум наш, во еже оставити стези нечестия и на путь спасения обратитися, неуклонно творити заповеди Божии и уставы Святыя Церкве соблюдати. Моли, благосерде, Человеколюбца Бога, да явит нам великую милость Свою: да избавит нас от смертоносных болезней и от всякаго зла, да сохранит и спасет рабов Божиих (имена) от всех козней и наветов вражиих. Да все мы сподобимся с тобою вечнаго блаженства, хваляще и превозносяще Бога во веки веков. Аминь.